Bydd yr awdures Anwen Francis o Aberteifi yn lansio ei nofel newydd i blant yn Gymraeg yn Eisteddfod Genedlaethol Cymru yn Nhregaron ar Awst 1. 

Mae’r fersiynau Saesneg – ‘Diesel the Donkey’ a ‘Diesel the Donkey and the BIG Cake’ – eisoes wedi gwerthu’n fyd eang ers Nadolig ac wedi trotian eu ffordd i Minnesota, Canada a Seland Newydd. 

Mae ‘Diesel y Donci’ yn dilyn hynt a helynt donci annwyl sydd â’r clustiau hiraf yng Nghymru ac yn cludo’r darllenydd ar antur gyffrous o bryder a digrifwch. 

Mae’r cymeriadau’n llawn egni, rhai yn ddihirod ac eraill yn dwyllodrus ond wrth galon y cyfan, mae’r donci bach annwyl gyda chalon fawr sydd am ddychwelyd i’w gartref ac at ei berchennog cariadus, Mrs Hwmffra.

Dros y blynyddoedd, mae Anwen wedi ysgrifennu nifer o lyfrau, y fwyaf poblogaidd Siani’r Shetland yn Gymraeg a Saesneg. 

Mae eu storiau wedi eu seilio ar gaseg go iawn, sef Siani, a oedd, tan ei marwolaeth yn 26 mlwydd oed yr wythnos diwethaf, yn byw adref gydag Anwen, ei gŵr Dilwyn a’r plant Soffia a Henri. 

Mae Anwen a Siani hefyd wedi ymweld â thros 100 o ysgolion ar draws Cymru a bu Siani’n seren deledu.

“Roedd y cyfnod clo wedi rhoi’r cyfle a’r amser i mi fwrw ati a rhoi’r holl syniadau ar bapur ac mewn llyfrau ac unwaith rwyf yn y parth, ni allaf roi’r gorau i ysgrifennu a bod yn greadigol,” meddai Anwen sydd â gradd feistr mewn Ysgrifennu Creadigol o Goleg y Drindod. 

“Penderfynais ysgrifennu nofel newydd ond wnes i erioed feddwl y byddai Diesel drwy’r Saesneg mor boblogaidd, nid yn unig yma yng Nghymru ond yn UDA hefyd lle mae’r galw yn aruthrol. 

“Mae’r adborth wedi bod yn wych ac mae archebion yn parhau i gyrraedd.”

Mae Anwen, hefyd yn gyfieithydd ar gyfer Cyfadran Iechyd a Gwyddorau gyda Phrifysgol Abertawe a cyn hynny, bu’n newyddiadurwr llawrydd, yn ddarlledwr ac yn golofnydd ceffylau i’r Western Mail. 

Roedd hi hefyd yn uwch-newyddiadurwr darlledu i BBC Cymru ac mae wedi cyhoeddi deg nofel. Erbyn hyn mae’n beirniadu ceffylau dros Brydain.

Ychwanegodd Anwen: “Rwyf wedi mwynhau ysgrifennu am gampau’r asyn yn fawr. Dw i wedi chwerthin a chwerthin yn uchel. 

“Byddaf bob amser yn profi’r nofel ar blant fy ffrindiau cyn y cyhoeddi ac mae’r chwiorydd Theodora ac Abigail o Sir Benfro wedi darllen rhannau o’r nofel ac wedi rhoi eu sêl bendith.”Hyfryd oedd eu gweld yn darllen ac yn mwynhau anturiaethau Diesel.’

Melanie Davies o bentre’ Penparc olygodd y nofel a Gary Evans o Aberaeron a ddyluniodd y clawr. Mae ei darlunydd, Mandie Davies yn hanu o Sir Benfro ac mae’r llyfr ar gael yn Awen Teifi, siop lyfrau Cymraeg Aberteifi.

Un sydd wrth ei bodd gyda gwaith Anwen yw’r gyflwynwraig a’r gantores enwog Shan Cothi.

“Fel un sy’n dwli ar anifeiliaid on i’n edrych mlan i ddarllen am yr asyn unigryw yma ac odi mae’n swyddogol, dw i di cwmpo mewn cariad da Diesel y Donci! 

“Mae’r Anwen wedi llwyddo i ddod â’r creadur drygionus yma yn fyw i ni a dwi’n siwr bydd yna gynulleidfa newydd yn dotio ar glustie doniol Diesel!

“Mae’n amlwg bod yr awdur yn deall hiwmor cefen gwlad i’r dim ac yn sicr yn adnabod ei phobol fel a ddengys yn ei phortreadau doniol a theimladwy.”

Mae Anwen yn gweithio ar y trydydd llyfr yn y gyfres yn Saesneg yn ogystal ag ail nofel yn y gyfres i ferched sy’n wallgof am geffylau o’r enw ‘Abigail’s Magic and the Snow Party’ sydd wedi ei seilio ar y Frenni Fach yng ngogledd Sir Benfro.

Mae modd prynu copiau o’r nofelau yn uniongyrchol wedi eu llofnodi gan Anwen ar anwen.francis@btinternet.com, neu oddi wrth Awen Teifi yn Aberteifi.

  • Bydd Anwen yn lansio ei nofel newydd am 11yb ar ddydd Llun, Awst 1, ar Stondin Amaethwyr Cymru.